ខេត្តសៀមរាប៖ក្រសួងយុត្តិធម៌ សហការជាមួយក្រុមកីឡាសេនាយុត្តិធម៌ បានរៀបចំកម្មវិធីជិះកង់អង្គរ លើកទី២ ដើម្បីរៃអង្គាសថវិកាជួយមន្ទីរពេទ្យជ័យវរ្ម័នទី៧ (គន្ធបុប្ផាទី៣) កាលពីថ្ងៃទី០១ ខែមិថុនាកន្លងទៅ ក្រោមអធិបតីភាពលោកឧបនាយករដ្ឋមន្រ្តី កើត រិទ្ធ រដ្ឋមន្ត្រីក្រសួងយុត្តិធម៌ ដោយមានការចូលរួមយ៉ាងច្រើនកុះករពីសំណាក់លោក លោកស្រី ជាមន្ត្រីរាជការក្រសួងយុត្តិធម៌ និងអ្នកពាក់ព័ន្ធក្នុងវិជ្ជាជី​វៈវិស័យយុត្តិធម៌។

លោក ជិន ម៉ាលីន រដ្ឋលេខាធិការប្រចាំការ និងជាអ្នកនាំពាក្យក្រសួងយុត្តិធម៌បញ្ជាក់ថា៖ ឆ្លើយតបទៅនឹង “យុទ្ធនាការ ១ ម៉ឺនរៀល ១ ម៉ឺននាក់” ដែលប្រកាសដាក់ចេញដោយលោកជំទាវបណ្ឌិត ពេជ ចន្ទមុន្នី, ឯកឧត្តម កើត រិទ្ធ ឧបនាយករដ្ឋមន្រ្តី រដ្ឋមន្រ្តីក្រសួងយុត្តិធម៌ បានដឹកនាំកម្មវិធីជិះកង់អង្គរលើកទី ២ របស់វិស័យយុត្តិធម៌ រៃអង្គាសថវិការួមចំណែកជួយដល់មូលនិធិគន្ធបុប្ផា។ ថវិកាដែលរៃអង្គាសបានពីវិស័យយុត្តិធម៌ ដើម្បីជួយដល់មូលនិធិគន្ធបុប្ផា បានចំនួន ១៥០០ លានរៀល ។

សូមជម្រាបជូនថា កម្មវិធី «ជិះកង់អង្គរ ដើម្បីរៃអង្គាសថវិកាជូនមន្ទីរពេទ្យជ័យវរ្ម័នទី៧ (គន្ធបុប្ផា៣)» កាលពីថ្ងៃទី១៨-១៩ ខែមីនា ឆ្នាំ២០២៣ កន្លងទៅ ក្រសួងយុត្តិធម៌ សហការជាមួយក្រុមកីឡាសេនាយុត្តិធម៌ ប្រមូលថវិកាបានសរុបចំនួន ៥៥៥,០០០,០០០រៀល ជូនមន្ទីរពេទ្យជ័យវរ្ម័នទី៧ (គន្ធបុប្ផាទី៣)៕